torsdag 30. september 2010

Fire fine torsdagsting

¤ Solsikkeballong i taket
¤ Nyklippa tånegler
¤ Ballett, piruett og kræsj inn i instruktøren
¤ Gele/sjokolade/aftereight-kake (ikkje prøv dette heime)

 
Ikkje prøv dette heime

onsdag 29. september 2010

Juno på ein onsdagskveld

Eg er visst litt svak for ho Ellen Page. I alle fall når ho vaggar rundt som ei and med ballong på magen og seier ting som Geez, Banana! Shut your freakin' gob!
Og Juno har verkeleg det finaste soundtracket, eg trur det ville ha vore nesten like bra å sjå han med bind for augene. Om ein då ikkje er av den nysgjerrige typen, då ville eg definitivt gått for bind-fri visning. Så får ein jo sjå dei fine fargane. Og hamburgertelefonen.

tirsdag 28. september 2010

Det er gratis å ønska

Om eg plutseleg vaknar midt på natta av ein liten fe som sit på magen min og seier Frøydis, sei kva du ønsker deg og eg skal trylla det fram, skal eg seie:
                                            


Squash-racket. Fordi eg vil, ikkje fordi eg kan. Og fordi det får meg til å springa og le samtidig.



Kamera. Eit fint eit som veit kva eg gjer når eg ikkje er heilt sikker sjølv.


Konsertbillettar til  Eva Cassidy og Beatles. Eventuelt ein tidsmaskin.


Ein sjokoladefabrikk, sånn som Willy Wonka sin men med dei gamle ompalompaane.


Eit piano. Og plass til pianoet.

mandag 27. september 2010

Ny dag

Ei helg full av Ben & Jerry's er ei god helg. Eg er glad, lykkeleg, himmelen er alltid blå bak aftenpoften, eg må skriva oppgave på fransk og det er ikkje kjipt ein gong. Hei ny dag, fint du kom!

Ny dag

onsdag 22. september 2010

Tighten up

Nokre dagar tenker eg på all den fantastiske musikken som finns der ute, som eg ikkje har høyrt og aldri kjem til å få høyra. Andre dagar set eg på the Black Keys.

tirsdag 21. september 2010

Boble

Eg bur i ei boble. Ho trillar meg rundt omkring, og av og til må eg springa for å halda tritt. Kvar dag passar ho på at eg ikkje får vondt, det har ho gjort i tjueein år, og eg har nesten aldri trongt å reparera ho. Eg har rulla over nokre småstein, det hender at det humpar men det går alltid bra, eg trør litt hardare og trillar vidare. Eg har aldri brukke bein, blitt stukke av veps, det er ingen som har dødd frå meg og eg har aldri hatt kjærleikssorg. Eg er så heldig at eg nesten ikkje veit det sjølv, og så ofte eg kan tenker eg på alt det fine og seiar takk, takk for at eg har fått ei boble som er så sterk.

Likevel er eg er redd for spikrar. 

søndag 19. september 2010

lørdag 18. september 2010

All I want is you to be my sweet honeybee

Photobucket

Kjærasthelg på kjærastRena med kjærasthopping og kjærastpiratfest.
(eg har kjærast)

fredag 17. september 2010

Eit lite boktips på morgonkvisten


her

Nokre bøker kunne ha klart seg utan ein slutt syns eg, og berre fortsatt i det uendelege. Eller i alle fall ha hatt ein like spanande oppfølgar. Det har ikkje Darlah av Johan Harstad, men ho har alt det andre som gjer at ein bør lesa ho likevel. Ho er skummel. Eg les berre skumle bøker om eg har nokon som kan holda meg rundt magen etterpå og passa på meg. Då eg las Darlah brøyt eg min eigen regel fordi eg ikkje kunne venta. Tre ungdommar vinn i lotteri og får reisa til månen, månen er ikkje så fredeleg som han burde vera. Kort oppsummert altså.

torsdag 16. september 2010

Du og eg og Paris








Me gjorde Paris på vår måte. Vår måte er å spela spel på kafé, å gå seg vill i endelause gater, å eta suppe med spisepinnar, å ha høgtlesing i fine parkar. Det er å synga opera i resepsjonen, å sjå sære filmar om menn som fødar fiskar og å drikka seg full på flyplassen. Men mest av alt er det å halda hender og kyssa på metroen og at det kiler i magen fordi det er du og eg og Paris, me høyrer saman og det kiler.

onsdag 15. september 2010

Dette ler me av på lingvistikk

Sidama er eit språk som blir snakka i Etiopia, litt her og der. Det er ikkje så rart, det rare kjem no. Dersom du er ein sidama-mann og snakkar til svigermora di, eller mens ho høyrer på, har du ikkje lov til å seie ord som byrjar med same lyd som namnet hennar. Altså, hvis ho heiter Silje, kan du til dømes ikkje seia sakkosekk, eller saft. Om du gjer det likevel er du frykteleg uhøfleg. For at ikkje livet som husbond skal bli altfor komplisert, finnes det difor eit ekstra sett med ord som ein kan ta i bruk rundt svigermor.

Lurt.

tirsdag 14. september 2010

Om å vera ein og to

Eg er eit einebarn. Det er berre eg som har mi mor, berre eg som har nekta å laga middag, og berre eg som har gøymt meg inntil ho når eg ikkje visste kva som var draum og kva som var verkeleg. Det er berre eg som har ropt så fæle ting at det gjorde vondt for meg og, berre eg som har henta kald klut og spurt om ho trong noko meir. Det har alltid vore oss, sør og nord, kald og varm, rar og rarare. No er det aust og vest og blod som er tjukkare enn vatn og saft og appelsinjus med fruktkjøt til saman.

Hei mor, takk for at du er mi

onsdag 8. september 2010

Dix-huit macarons, s'il vous plaît



Berre. Ti. Timar. Igen.

mandag 6. september 2010

Eg veit ikkje kva eg skal bli


Astronaut?

Om å sakna

Eigentleg er det fint å sakna. Så lenge det er på eit middels intenst nivå, og ikkje på eit hol-i-hjarte-under-dyna-heile-dagen-skyt-meg-no-nivå. Når eg saknar noko gler eg meg ofte samtidig, og det er ein av dei finaste vanane eg har.

I dag saknar eg å vera meg i desse augneblinkane.






søndag 5. september 2010

Husvarming


På fredag varma me opp til den store innflyttingsfesten som skulle vera på lørdag og som me hadde gleda oss til i minst ein månad. Me tok på oss kjolar som matcha og dansa som galningar.


Eit vertskap må tilby noko til gjestane sine, me laga glutenfrie muffinsar med dinosaurar og fekk stjerne i boka hjå søliaki-jentene.


Sidan alle kom for seint, underhaldt me oss sjølv med miming på ein kasse. Eg var ananas.


Heldigvis kom det nokon.


Eirik var sist ut av døra fordi han hadde gløymt nøklane. Då klappa me i kanskje eit minutt.

FFF!
(for ein fest)

torsdag 2. september 2010

Om å føla seg som ein potetsekk

Du svevar ein centimeter over golvet over bakken over jorda, høyrar ikkje anna enn musikken som spelar langt der inne i øyra og kjennar at orda kjem ut av armane, halsen, tærne. Du strekk deg så langt at du rekk opp til himmelen, du er ein fuggel men eigentleg er du berre ein sekk med poteter.

Eg treng litt meir trening.

Ballett <3

onsdag 1. september 2010

Dans oppå bordet

her

I morgon byrjar eg på ballett, 21 år gamal. Eg og Solveig. Me kan ikkje dansa ballett, og eg kan eigentleg ikkje dansa på nokon andre måtar heller. Unntatt kanskje på den fulle måten. Det seier seg nesten sjølv at i morgon kan bli ein morosam dag, om ein meiner at morosam og flau er synonym, noko eg gjer. For å forbereda meg har eg høyrt på klassisk musikk og øvd meg på å setta håret opp i ein topp. Det har eg sett at dei gjer, dei som kan ballett.

Ps. håpar eg får vera svane.

Som boblene i bekken

Eg likar

<> at laksen hugsar kor han blei fødd og kjem attende
<> at datamaskinen min har ein pult å kvila på
<> at det er eg som har bygga den pulten
<> at eg et makronar i Paris om ei veke
<> at ei veke nesten ikkje er noko tid i det heile
<> at det finns skyer, så me kan setta meir pris på sola
<> at me ikkje har troll i Noreg