Pluss og minus

Avstandsforhold. Noko av det kjipaste eg veit om! Og no har eg altså vikla meg inn i enno eit. Min finaste Mathias har vendt tilbake til Norge for å laga eksamensfilmen sin, og eg heng att i London for å synga litt meir. I den anledning tenkte eg at ei pluss-og-minus-liste var på sin plass, kanskje mest fordi eg treng å hugsa på at det faktisk fins eit par plussar.

- Å vakna om morgonen utan nokon som mumlesøv på sida
- Vondt i hjartet
- At det ikkje er nokon til å varma opp dyna på kalde kveldar (må kjøpa varmeflaske!)
- Å sjå ein rev eller ein rar pinne, og ikkje ha nokon å sei "sjå!" til
- Å laga middag til éin

+ Gjensynsglede!
+ Å ta sit-ups saman på skype
+ Å ligga midt i senga, gjerne i stjerneformasjon
+ Å samla opp kaféar og fine gater som eg kan visa fram på neste besøk
+ Å planlegga og gleda seg
+ Pakkar i posten med sjokolade og kjærleik i

Og når alt kjem til alt er eg jo svinheldig som har nokon å sakna i det heile. Trur eg skal legga meg i stjerneformasjon og eta litt sjokolade.

5

Av og til tenker eg at eg må vera den heldigaste som fins. Som får vakna opp på sida av ein varm kropp kvar dag, som i tillegg er den kroppen eg likar best i heile verda. Å vera bestevenn med kjærasten sin er ein veldig bra ordning, truleg den beste ordningen eg har fått i stand nokon gong. I dag er eg ekstra glad! Då eg vakna kribla det i magen, og nokre minutter seinare satt det ein kaninlampe i senga og kikka på meg. Frå deg, du som støttar meg og tørker tårene mine og ler av meg når ingen andre syns eg er morsom. I dag har me vore saman i fem år, og det kjennes betre enn alt. Hurra!

  

Eit bilete som alltid får meg til å smila

Ein bitteliten Mathias. Han seier han var sjuk, eg seier han var søt.

JA

Om ein dag kjem denne hånda til København. O lykke!

Ein to tre fir

I dag er ein fin dag, fordi det er fire år sidan Mathias spurte meg om me ikkje snart skulle kyssa. Fire år! Det feirar me med sushi, roser, skrapelodd, monopol, og sjølvsagt kyssing.

Onsdagsmorgon

Eg vaknar sjølv om eg ikkje vil, dusjar sjølv om eg ikkje vil, et frokost sjølv om eg ikkje vil. Så pustar du. Litt høgare enn før, vrir deg bittelitt, og eg ser på at kroppen min smyg seg inntil din, sånn som eg gjorde då eg var lita og ikkje ville vekka mor, berre høyra ho sove. Eg høyrar på at du søv, akkurat no så elskar eg deg så mykje at hjarte vil sprenga, eg gret og du seiar at det er noko klissete på skuldra di. Du seier: lukk augene. Eg lukkar, og du tek meg med til Paris, me går i Champs-Élysées og eg får fem lakrismakronar i handa. Me søv, eg me klede, du naken, eg drøymer om granateple og du om trolldeig. Du spør om eg er laga for å gjera deg glad, og det er eg jo, biologisk predisponert for å gleda deg. Me står opp og panneluggen min har blitt til eit roteloft.

Kjærligheten er en fanklubb med bare to medlemmer

Hausten 2007, Kongsberg. Nyfunnen kjærleik <3

Hovudet under dyna

Nokre dagar vil eg ikkje åpne augene, ikkje lyfte på dyna og ikkje trekke opp persiennene. Eg vil ikkje skru på lyset, eta frokost, pussa tenner, høyra på musikk eller seia hei til nokon. Eg vil berre ligga der med hovudet under dyna, heilt til du kjem og legg deg inntil meg og seier at no er eg her, eg skal ingen plass og me skal ligga her i heile dag. Nokre dagar er eg flink på avstandsforhold, men i dag er eg den dårlegaste i verda. Au.

Eg skulle skriva eit innlegg som var så fint at du skulle ringa meg og seie eg elskar deg

Tre år og eg vil ha hundre til.

All I want is you to be my sweet honeybee

Kjærasthelg på kjærastRena med kjærasthopping og kjærastpiratfest.
(eg har kjærast)

Den finaste helga nokon gong

Det byrja med raude roser i ei brun hand, makronar i ei anna og heldigvis så hadde me ikkje gløymt korleis ein kyssar, eg lurte litt på det. Etter det kom alt som perler på ei snor, og kvar perle var av den typen ein må dykka minst hundre meter for å finna, og når ein tek ho med til overflata og ser kor fint ho skin vil ein gøyma ho vekk og visa ho til barnebarn og alle som vil. Jungelmiddag og drivhus, hyllebæring og endeleg, endeleg ser eg korleis rommet mitt skal bli og eg ser at det kan bli frykteleg fint om eg ikkje passar meg. Tida hadde på seg sjumilsstøvlar og plutseleg sat me der i trusa, på golvet med eiffeltårnet som skal puslast oppover.

Hjarte

Gamle menneske. Helst skulle ein kryssforhøyra dei kvar dag, og skriva ned alt det fine som kjem ut av dei. Og så fekk ein vel ta med ein rap her og der, eller gorp, som mormor mi seier.
- Eg berre gorpar litt eg.
Kvar dag går ho på tur med trillasen (les: rullatoren) og etterpå ser ho på macen (les: macGyver). Han er no frykteleg lur, og sjølv om ho har sett alle episodane tre gonger så er det like spanande for ho huskar vel ikkje korleis det endar kvar gong. Tenk, ho er nittitre år gamal, og finast i verda.

<3

Du

Du som aldri har budd på landet skulle vore der, stått så nært bålet at du måtte lukka augene og kjenna at kinna vart raude og varme. Du som aldri har tråkka i ein kuskit, du skulle ha vore der, sete tett inntil meg under teppet og klødd meg på ryggen, hardt, for å koma gjennom alle laga med klede. Du skulle ha sett på kuene, eg skulle tatt deg i handa og vist deg at dei ikkje er farlige, berre frykteleg nyfikne. Me skulle gått, eg fysst, oppå steingarden med sola som bada i sjøen og eg skulle snu meg og kyssa deg akkurat på det høgaste punktet der ein kan sjå nesten så langt ein vil i alle himmelretningar.

Gut tut fut sprut knut lut stut grut nut

Ja for tenk at eg er den heldigaste jenta!
Sjå berre kor fin han er <3
Og så har eg rima litt, for av og til kan me sitta og rima på det same ordet superlenge og det er eit av nøtteskala me passar inn i. Og når han les dette kjem han til å finna enda fleire ord som rimar, galningen.

Bonsoir

Eg har ei rar kjensle i magen min. Litt som om eg skal flytta til eit anna land i morgon, eller som eg skal til tannlegen og bora utan bedøving. Eg skal ingen av delene, så nett no forstår eg ikkje heilt kva det er. Går det an å få vondt i magen av å sakna kjærasten sin?

Eg saknar.

varme armkrokar som luktar mannesvette
å laga kitling i magen
nase med naseplaster
lesing om haren som spring
å pussa tenner med deg
munnskyllevatn som drep insekt
kameraer
klede i sofaen på golvet under putene oppå stolen
hud utan klede
football manager kvar gong eit minutt er ledig
tårer som ikkje er triste, heilt motsatt
synging ikkje bare i telefonen
hobbitfot

Her er det mykje internt men det skal det vera. Hei du der i den lille leiligheita i den store byen, som eg saknar deg! I morgon kjem eg med kyss og bilete og kanskje noko anna som er til deg, fordi eg vil gje deg alt mogleg heile tida.

Om gutar og spesielt ein gut

Eg bur i lag med ein gut. Mette Amalie vil ikkje bu i lag med gutar for ho seier dei er skitne, eller i alle fall at dei ikkje er så gode til å vaska. Men ho har jentekjærast, så eg vender det døve øyra til. Det høyre øyra, for der høyrer eg ikkje så godt som eg burde seier øyrenasehalslegen. Eg likar å bu i lag med ein gut, spesielt sidan han er fin, ganske ofte rein og veldig alltid min. Dessutan er han veldig god til å vaska, både golvet og opp. Av og til har me kosedag, og det betyr at me held henner og kyssar på t-banen og går i gater me aldri har gått i og skrapar kryssordflaks og drikk gratis kaffi i vindauge på det store biblioteket som har utsikt til alle dei gamle bøkene.

Eg har blåe negler og prikkar i augnekroken. Det skal eg ha i morgon òg. No skal eg snart legga meg og høyra på at Mathias les for meg frå den fine boka som er morosam og kanskje litt trist hvis ting går sånn som dei ser ut til å gå.